25. april 2002 UPA2002/24
Kulturikkut ingerlatsineq sunngiffimmilu sammisassaqartitsineq pillugit
Inatsisartut peqqussutissaattut siunnersuut
pillugu
Inatsisartut Kultureqarnermut Ilinniartitaanermullu Ataatsimiititaliaata
ISUMALIUTISSIISSUTAA
aappassaaneerinermi saqqummiunnneqartoq
Inatsisartut Kultureqarnermut Ilinniartitaanermullu Ataatsimiititaliaat suliarinninnermini ukunin-nga inuttaqarpoq:
Inatsisartuni ilaasortaq Naimángitsoq Petersen, Atassut, siulittaasoq
Inatsisartuni ilaasortaq Ruth Heilmann, Siumut, siulitaasup tullia
Inatsisartuni ilaasortaq Lars Karl Jensen, Siumut
Inatsisartuni ilaasortaq Olga Poulsen, Inuit Ataqatigiit
Inatsisartuni ilaasortaq Mogens Kleist, Kattusseqatigiit
Inatsisartut Kultureqarnermut Ilinniartitaanermullu Ataatsimiitialiaata siunnersuut UPA2002-mi siullermeerneqareermat nassuiaatitai ilanngullugit misissuataarpaa.
Inatsisissatut siunnersuutip suliarineqarnerani atugassamisut Inatsisartut Kultureqarnermut Ilinni-artitaanermullu Ataatsimiititaliaata tusarniaanermi akissutigineqartut nuutinneqarnerinik pini-arpoq.
Ataatsimiititaliap maluginiarpaa KANUKOKA-p tusarniaanermut akissummini oqaatigigaa kommunit naammagittaalliutigisaat kulturikkut sunngiffimmilu siulersuisunik pilersitsinikkut pineqartup nukittorsaaviginissaatut siusinnerusukkut eqqarsaatersuut peqqussutissatut siunnersuummit peerneqarsimasoq. Aallaqqaammut siunertaaqqaaraluarpoq maannakkut fritidsnævniusut, siunnersuutikkut matumani pineqartukkut atorunnaarsinneqartussatut siunnersuutigineqartut, siulersuisunit taarserneqassasut.
Naalakkersuisut, kommunini iluarsartuusseqqinnissamut ataatsimiititaliarsuup immikkut inatsisi-liornikkut aqutsinermut maleruaqqusanik aalajangersaanissamik inassuteqartoqannginnera inner-suussutigalugu, KANUKOKA-mit kissaatigineqartoq malissallugu periarfissaqarsimanngillat.
Ataatsimiititaliap isumaqatigiittup Naalakkersuisut tunngavilersuutigisaat paasilluarpaa.
Ataatsimiititaliap iluarisimaarpaa sunngiffimmi sammisassaqartitsinermut siulersuisunik pilersit-sisoqanngikkaluartoq peqqussutissatut siunnersuut naapertorlugu kulturikkut sunngiffimmilu sammisassaqartitsinikkut pilersaarusiorsinnaanissamik kiisalu taassuma isumaginissaanut sulisutigut atugassat pisariaqartitat atorfinitsissallugit kommunalbestyrelse nammineerluni periarfissaqarmat.
Kulturikkut sunngiffimmilu sammisaqartitsinerit ilaanneeriarlutik imminnut ima akulerusimatigisarput suna sumut atanersoq takujuminaallisinnaasarluni. Taamaammat nuannaarutissaavoq siunnersuutikkut kulturikkut sunngiffimmilu sammisassaqartitsinermut tunngasut naligiilersinneqarnissaat qulakkeerniarneqarmat.
Siunnersuutikkuttaaq aalajangersarneqassaaq inuussutissarsiutigalugu ingerlatsinermut Naalakkersuisut tapersiinerat sammitinneqarnerusariaqartoq, inuiaqatigiinnimi ataatsimut isigalugu inuussutissarsiutigalugu ingerlatsineq annertusiartortoq paasineqarsimammat. Ataatsimiititaliap naammagisimaarnarluinnartutut isigaa eqqumiitsuliornikkut suliaqarnerup inuussutissarsiutitut ingerlanneqarsinnaanera kulturikkut suliniarnermi kulturikkullu naalakkersuinermi anguniagassanut ilaatinneqalernera.
Ataatsimiititaliap isumaqatigiittup Kulturikkut ingerlatsineq sunngiffimmilu sammisassaqartitsineq pillugit Inatsisartut peqqussutissaattut Naalakkersuisut siunnersuutitut saqqummiussaat taperserpaa.
Inatsisartut Kultureqarnermut Ilinniartitaanermullu Ataatsimiititaliaat taama oqaaseqarluni siunnersuut aappassaanigassanngortippaa.
Naimángitsoq Petersen,
Atassut, siulittaasoq
Ruth Heilmann, Siumut
siulittaasup tulliaLars Karl Jensen, Siumut
Olga Poulsen, Inuit Ataqatigiit Mogens Kleist, Kattusseqatigiit